«Կյանք ու կռիվ» ֆիլմի ռեժիսորը և բեմադրող օպերատորը պատասխանել են ապագա մեդիամասնագետների հարցերին

Blognews.am-ը գրում է.

«Պետք չէ կեղծել, ստել, պետք է կարողանալ լավին լավն ասել, վատին՝ վատը: Ուղիղ խոսեք, որ ամեն ինչ փոխվի դեպի լավը, իսկ փոխողը դուք եք». ռեժիսոր, սցենարիտ Մհեր Մկրտչյանի խորհուրդն է մեդիայի ապագա աշխատողներին:

«Պանարմենիան Մեդիա դպրոց»-ի սաները «Կյանք և կռիվ» ֆիլմի դիտումից հետո բացառիկ վարպետության դաս ունեցան ֆիլմի ռեժիսոր, սցենարիստ Մհեր Մկրտչյանի և բեմադրող օպերատոր Վահագն Տեր-Հակոբյանի հետ: Հանդիպումը նաև գործնական աշխատանք էր դպրոցի սաների համար:

Սաներին հետաքրքրում էր ոչ միայն ֆիլմի սցենարական, դերասանների ընտրությունը, այլև թե ինչպես է նկարահավել ֆիլմը, և ինչ դժվարություններ են եղել: Հանդիպման ժամանակ Մհեր Մկրտչյանը և Վահագն Տեր-Հակոբյանը մասնագիտական խորհուրդներ տվեցին սաներին, ներկայացրին աշխատանքի նրբությունները, ռեժիսոր-օպերատոր հարաբերությունները. «Երբ նկարահանման հրապարակում օպերատորը և ռեժիսորը իրար հասկանում են, արդյունքում լավ ֆիլմ է ստացվում»,- նշեց Վահագն Տեր-Հակոբյանը:

Մհեր Մկրտչյանը «Կյանք ու կռիվ» ֆիլմի և՛ սցենարիստն է, և՛ ռեժիսորը, իսկ դա, ըստ նրա, մի քիչ վտանգավոր է. «Երբ սկսում ես որպես ռեժիսոր աշխատել, պետք է դադարել սցենարիստ լինել, որովհետև դա իր մեջ ունի վտանգ: Սցենարիստին դուր է գալիս այն, ինչ գրում է, իսկ ռեժիսորը պետք է հասկանա՝ որն է պետք, որը՝ ոչ: Այս ֆիլմում ինձ հաջողվեց դադարել սցենարիստ լինել»:

Հանդիպման ավարտին հյուրերը հայտնեցին, որ «Կյանք և կռիվ» ֆիլմի 2-րդ հատվածի նկարահանումները սկսված են, և Մեդիա դպրոցի ուսանողները բացառիկ իրավունքով հնարավորություն կունենան մասնակցելու նկարահանումներին:

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի