ԱՄՆ-ում սպիտակամորթ տղամարդը սեւամորթ դեռահասին աղբ է համարել ու սպանել նրան

ԱՄՆ Չարլսթոն քաղաքում սպիտակամորթ տղամարդը սպանել է սեւամորթ դեռահասին, հայտնում է The Independent–ը։

62-ամյա Ուիլյամ Փուլիամի խոսքով, ինքը գործել է ինքնապաշտպանության շրջանակում։ Նա փողոցում բախվել է 15-ամյա Ջեյմս Մինսին, որից հետո մտել է շուրջօրյա խանութ։ Այնտեղից դուրս գալով՝ տեսել է , որ Ջեյմսն այդ ամբողջ ընթացքում սպասում էր իրեն ու սկսել է մոտենալ։ Դրանից հետո Փուլիամը հանել է ատրճանակը ու երեք անգամ կրակել դեռահասի որովայնին։ Մի քանի ժամից Մինսը հիվանդանոցում մահացել է։

Ոստիկանները հայտնել են, որ Փուլիամը հարցաքննության ժամանակ  զղջումի ոչ մի նշան ցույց չի տվել։ «Ես համարում եմ, որ իմ շնորհիվ փողոցում աղբը քչացել է»,- ասել է նա։ Մինսի հարազատների ու ծանոթների խոսքով, տղան երբեք որեւէ մեկին վնաս չի պատճառել, բարեգործական կազմակերպության անդամ էր ու բազմաթիվ ընկերներ ուներ։

Տվյալների բազայում հայտնաբերվել է, որ Փուլիամը ատրճանակ ունենալու թույլատվություն չուներ։ Նրան արգելվել էր զենք կրել այն բանից հետո, երբ հայտնի է դարձել, որ նա բռնանում է ընտանիքի անդամների վրա։ 2013-ին տղամարդը ծեծել էր իր հղի դստերը, ապտակել նրան ու ոտքով հարվածել որովայնին։
 Նա վեց օր բանտ էր նստել ու ազատ արձակվել մեկ տարի փորձնական ժամկետով։

Հիմա Փուլիամը բանտում է, նրան մեղադրանք է առաջադրվել սպանության համար։ Իմանալով որ մինչեւ դեկտեմբեր ինքը բանտից դուրս չի գա՝ տղամարդը վշտացած ասել է, որ այդ դեպքում ինքը կկորցնի աշխատանքը ու ստիպված կլինի հացադուլ հայտարարել։