ՆԱՏՕ-ի ԽՎ նոր նախագահն արդյունավետ համագործակցություն ունի հայ պատվիրակների հետ

ՆԱՏՕ-ի խորհրդարանական վեհաժողովի ավարտված նստաշրջանի ընթացքում տեղի է ունեցել վեհաժողովի նախագահի փոփոխություն: Նոյեմբերի 25-ին լրագրողների հետ հանդիպմանն այս մասին հայտնեց ՆԱՏՕ-ի խորհրդարանական վեհաժողովում հայաստանյան պատվիրակության ղեկավար, ԱԺ ՀՀԿ խմբակցության պատգամավոր Կորյուն Նահապետյանը: «Վեհաժողովի նախագահ է ընտրվել իտալացի պատվիրակ Պաուլո Ալին: Պետք է ուրախությամբ նշեմ, որ մենք նրա հետ բավականին երկար ժամանակ արդյունավետ համագործակցում ենք»,- «Արմենպրես»-ի հաղորդմամբ՝ նշեց Նահապետյանը:

Նա ընդգծեց, որ ՆԱՏՕ-ի խորհրդարանական վեհաժողովի նորընտիր նախագահը ժամանակին նաև Հայաստան է այցելել, բացի այդ, հայաստանյան պատվիրակության անդամները միշտ նրա հետ արդյունավետ համագործակցել են:

Վեհաժողովի նստաշրջանի ընթացքում քննարկվել և ընդունվել է 6 բանաձև, 16 զեկույց: Բոլոր բանաձևերը վերաբերվել են գլոբալ և տարածաշրջանային անվտանգության խնդիրներին: Կորյուն Նահապետյանը նշեց, որ հայկական պատվիրակության անդամները ակտիվ մասնակցություն են ունեցել բոլոր հարցերի քննարկումներին, հնչեցրել են առաջարկներ և մտահոգություններ են հայտնել:

Կորյուն Նահապետյանը նաև հավելեց, որ նստաշրջանի ընթացքում զեկույցներով հանդես են եկել Թուրքիայի արտաքին գործերի, արդարադատության, գիտության և տեխնոլոգիայի նախարարները, զինված ուժերի գլխավոր շտաբի պետը: Նրանց զեկույցներից հետո եղել է հարցուպատասխանի հնարավորություն և հայկական պատվիրակության անդամները կարողացել են իրենց հարցերն ուղղել թուրք պաշտոնյաներին: Նահապետյանը դժգոհություն հայտնեց, որ հարցուպատասխանից հետո պատգամավորները ելույթներ ունենալու և իրենց մտահոգությունները հայտնելու հնարավորություն չեն ունեցել: