Պուգաչովայի առանձնատան մոտ ձերբակալված հիջաբով կնոջը հոգեբուժարան են ուղարկել

Անցյալ շաբաթ ռուսական Գրյազ գյուղում Ալլա Պուգաչովայի եւ Մաքսիմ Գալկինի դղյակ-առանձնատան մոտ սեւ հիջաբով կնոջ էին ձերբակալել: Անվտանգության աշխատակիցները կնոջը նկատել էին մեծ պայուսակը ձեռքին առանձնատան մոտակայքում զբոսնելիս եւ ոստիկանություն կանչել: Իրավապահները ձերբակալել էին նրան ու հարցաքննել:

«Կասկածյալին խուզարկել են: Նրա մոտ «մահապարտի գոտի» չի հայտնաբերվել, պայթուցիկներ՝ նույնպես: Նաեւ նրա հագուստի քիմիական փորձաքննություն է կատարվել. պայթուցիկների հետ շփում չի եղել: Նրան նաեւ ալկոհոլի, թմրանյութերի քննության են ենթարկել: Ամեն ինչ մաքուր է»,- պատմել են ոստիկանությունում: Հարցաքննության ժամանակ կինը ոչ ադեկվատ է դրսեւորել իրեն:

Առայժմ հայտնի է, որ 45-ամյա Մադինան Ինգուշեթիայից է: Նա բացատրել է, որ Մոսկվա է եկել հատուկ Ալլա Պուգաչովային տեսնելու համար: Իբր՝ տեսիլք է ունեցել, որ երգչուհին սպասում է իրեն եւ ուզում է խոսել իր հետ: Իսկ ինքն էլ «Ալլահի առաքյալն է»: Մադինան մամուլում կարդացել է, որ Պուգաչովան ապրում է Մերձմոսկվայի Գրյազ գյուղում: Արդյունքում նա ճանապարհածախս է հավաքել, իսկ կայարանից գյուղ է հասել տարբեր մեքենաներով:

«Նախնական վարկածի համաձայն՝ կինն այնքան էլ ադեկվատ չէ, այդ պատճառով նրան հոգեբուժարան են ուղարկել՝ զննության: Պուգաչովայից եւ Գալկինից դիմում են վերցրել, որ որեւէ պահանջ չունեն նրանից»,- իրավապահ մարմինների ներկայացուցչին է վկայակոչում «Комсомольская правда»-ն:

Սակայն հիջաբով տարօրինակ կինը հետաքրքրել է հատուկ ծառայություններին: Պարզվել է, որ Մադինայի պայուսակում ծայրահեղական գրականություն են հայտնաբերել:

NEWS.am STYLE