Գեղեցկության սրահը, որտեղ տեղի է ունեցել հրաձգությունը, պատկանում է չարբախցի ոմն Գեղամի

News.am-ը գրում է.

Շենգավիթ վարչական շրջանում գործող «Լիա» գեղեցկության սրահը, որտեղ նոյեմբերի 13-ին տեղի է ունեցել հրաձգություն, պատկանում է չարբախցի ոմն Գեղամի: NEWS.am-ի հետ զրույցում շենքի բնակիչները նշեցին, որ երեկոյան հրաձգությունը տեղի է ունեցել գեղեցկության սրահի տակ գտնվող օբյեկտում, որտեղ հաճախ են հավաքվել քրեական դեմքեր եւ «փողի ռազբորկա» արել:

«Սա առաջին դեպքը չէ, անընդհատ դա փողի ռազբորկաների մեջ է: Անմեղ տղաներին էլ կանչում էր, որ իր կողմից մարդիկ շատ երեւան, ինքը շատ վախկոտ մարդ է, դրա համար էլ կողքից տղաների էր կանչում՝ իբր տեսեք ես շատ կողմնակից ունեմ: Էդ անմեղ տղաների գլուխն էլ տարավ, կերավ: Էդ սրահի տակը մի հատ օբյեկտ է սարքել, ռազբորկաներ անելու բույն ա ու անընդհատ ծեծկռտուք, ռազբորկաներ...»,-պատմեցին հարեւանները:

Նրանց խոսքով՝ երեկոյան կրակոցների ձայն չեն լսել, դեպքի մասին տեղեկացել են, երբ ոստիկանության աշխատակիցներ են եկել՝ դեպքի ահազանգով:

Մեր տեղեկություններով, երեկ երեկոյան «փողի ռազբորկան» տեղ է ունեցել «չարբախցի Գեղամի» եւ Ճվճվ Արոյի տղաների միջեւ:

Ավելի վեղ NEWS.am-ը տեղեկացրել էր, որ Շենգավիթ վարչական շրջանում գործող «Լիա» գեղեցկության սրահում հրաձգություն է տեղի ունեցել, որի հետեւանքով երեք երիտասարդ տեղափոխվել է հիվանդանոց: Ավելի ուշ հիվանդանոց տեղափոխվածներից երկուսը մահացել են: