Ի պաշտպանություն Հայկ Կյուրեղյանի՝ վաղը քաղաքացիները դատարանի դիմաց բողոքի ակցիա կանցկացնեն. հնարավոր է՝ դատավորը նրա վերաբերյալ վճիռը հրապարակի հենց վաղը

Վաղը՝ սեպտեմբերի 11-ին, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի կունենա Շանթ Հարությունյանի և ընկերների գործով առաջին դատական նիստի ժամանակ դատարանի բակում բողոքի ակցիա անցկացրած Հայկ Կյուրեղյանի գործով դատական նիստը: Ամենայն հավանականոթյամբ, դատարանը հենց վաղն էլ Կյուրեղյանի վերաբերյալ վճիռը կհրապարակի: Հիշեցնենք, որ նախորդ դատական նիստի ժամանակ դատախազը հանդես է եկել մեղադրական ճառով՝ դատարանից պահանջելով Կյուրեղյանին դատապարտել 14 տարվա ազատազրկման:

Նշենք, որ ըստ «Դատալեքս» դատական տեղեկատվական համակարգի՝ Կյուրեղյանին մեղադրանք է առաջադրվել այն բանի համար, որ նա 2014թ. հունիսի 12-ին՝ ժամը 11:45-ի սահմաններում, գտնվելով հասարակական վայր հանդիսացող՝ Երևան քաղաքի Տիգրան Մեծի պողոտայի թիվ 23/1 հասցեում գտնվող Երևանի Կենտրոն և Նորք-Մարաշ վարչական շրջանների ընղհանուր իրավասության դատարանի շենքի առջևի հատվածում, բողոքի ակցիա իրականացնող քաղաքացիների շարքում, կոպիտ կերպով խախտելով հասարակական կարգը, հասարակության նկատմամբ դրսևորել է բացահայտ անհարգալից վերաբերմունք՝ իր անկախությունը՝ հասարակության մեջ ընդունված վարքագծի կանոններից շեղելու, ինչպես նաև իր անձը հասարակությանը հակադրելու՝ իր գերակայությունն ի ցույց դնելու մղումով բարձրացել է դատարանի շենքի առջևի ավտոկայանատեղիում կայանված Քրիստինա Սարդարյանին պատկանող «Միցուբիշի Պաջերո» մակնիշի «21 ՕԼ 053» հաշվառման համարանիշի ավտոմեքենայի տանիքին, ապա, անտեսելով տարածքում ծառայություն իրականացնող ոստիկաններին, քայլել է մեքենայի տանիքի վրայով և դիտավորությամբ վնասել այն՝ Ք. Սաալարյանին պատճառելով 284.000 (երկու հարյուր ութսունչորս հազար) ՀՀ դրամի գույքային վնաս, աղմկել է ու բռնություն գործադրել՝ որպես զենք օգտագործվող առարկայով՝ իր մոտ պահվող «Մակարով» տեսակի օդամղիչ ատրճանակով կրակոցներ է արձակել տարածքում ծառայություն իրականացնող՝ իշխանության ներկայացուցիչներ հանդիսացող՝ ՀՀ ոստիկանության ծառայողներ Արմինե Գրիգորյանի, Սամսոն Ղարիբյանի, Միքայել Այվազյանի, և Արտաշես Նիկողոսյանի ուղղությամբ և դիտավորությամբ նրանց առողջությանր պատճառել թեթև վնասի հատկանիշներ չպարունակող վնասվածքներ, այնուհետև, տեսնելով իրեն մոտեցող ոստիկաններին, սպառնացել է իրեն մոտենալու դեպքում ձեռքում եղած պլաստմասսե առարկայով պայթեցնել մարդկանց հոծ բազմության կողքին կայանված ավտոմեքենան, ապա շարունակելով անհնազանդ վարքագիծը և չենթարկվելով իշխանության ներկայացուցիչ հանդիսացող՝ ՀՀ ոստիկանության Երևան քաղաքի վարչության ՊՊԾ գնդի 1-ին դասակի 2-րդ վաշտի հրամանատար Արայիկ Վիկտորի Աբելյանի՝ ավտոմեքենայի տանիքից իջնելու օրինական պահանջին, և տեսնելով նրա ձգտումը՝ ֆիզիկական ուժի գործադրմամբ խափանելու իր գործողությունները, կապված վերջինիս կողմից իր ծառայողական պարտականությունների կատարման հետ, նրա կյանքի և առողջության համար վտանգավոր բռնություն գործադրելով՝ հիշյալ ատրճանակով կրակել է Ա. Աբելյանի ուղղությամբ և դիտավորությամբ վերջինիս առողջությանը պատճառել է թեթև վնաս՝ առողջության կարճատև քայքայումով՝ ճակատի աջ կեսի սալջարդ վերքի ձևով, իր այդ դիտավորյալ գործողություններով շուրջ 5 րոպե տևողությամբ անհարմարություն պատճառելով տարածքում գտնվող հասարակության անդամներին։

Վաղը՝ ժամը11:00-ին, դատարանի դիմաց տեղի կունենա բողոք ակցիա՝ ի պաշտպանություն Կյուրեղյանի: Facebook սոցիալական ցանցում ստեղծվել է «14 տարի ազատազրկում՝ ընդդեմ քաղաքական ակցիայի» խումբ, որում ընդգրկված քաղաքացիները պատրաստվում են մասնակցել բողոքի ակցիային:

Արաքս Մամուլյան