Ինչպե՞ս է անցել Ռուբեն Հախվերդյանի առաջին «բուրժուական» համերգը

 

«Մեր սիրո աշունը», «50-ից հետո», «Կտակ», «Իմ փոքրիկ նավակ», «Երևանի գիշերներում», «Եթե իմանայիր», «Ձյուն». նոյեմբերի 5-ին Արամ Խաչատրյան մեծ համերգասրահում հախվերդյանական տրամադրություն էր։ «Կտրուկ շրջադարձ» խորագրով համերգի ժամանակ հանդիսատեսը հայտնի ու սիրված ստեղծագործություններն ունկնդրեց նոր մոտեցմամբ։

Ստեղծագործությունների նոր մշակումն արել է Նարինե Զարիֆյանը։ Ռուբեն Հախվերդյանն առաջին անգամ էր ներկայանում Հայաստանի պետական կամերային նվագախմբի հետ (դիրիժոր՝ Վահան Մարտիրոսյան): Երաժիշտը կեսկատակ ասաց, որ սա իր առաջին «բուրժուական» համերգն է։

Համերգի ժամանակ նոր ստեղծագործություններ չհնչեցին։ Հեղինակ-կատարողն ասաց, որ այս ժանրի ստեղծագործությունները 5-10 տարին մեկ են ծնվում: «Ես կարող եմ օրը 10-20 երգ գրել, սակայն դրանք երկար չեն ապրի: Մեծ դժվարությամբ են ստեղծվում երգերը, որոնք ունեն ոչ միայն երաժշտական, այլև բանաստեղծական արժեք։ էս տեսակ երգերի խոսքն ու երաժշտությունը միասին են ծնվում»,- ասաց Հախվերդյանը։

Հախվերդյանական պատմություններն այս անգամ ավելի քիչ էին, երաժիշտն ավելի շատ երգում էր։ Նա նշեց, որ իրեն արգելել են խոսել քաղաքականությունից, սակայն չկարողացավ չարտահայտել իր ուրախությունն այն առիթով, որ Հասմիկ Պողոսյանն այլևս մշակույթի նախարար չէ։ Մշակույթի նորանշանակ նախարար Արմեն Ամիրյանին Հախվերդյանը բնութագրեց որպես «բանիմաց, լավ տղա»։

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի