Կայացավ «Տավշո արմատներ» գիրք-հանրագիտարանի շնորհանդեսը

 Հայ լեզվաբան, մանկավարժական գիտությունների թեկնածու, պրոֆեսոր Լավրենտի Միրզոյանի «Տավշո արմատներ» գիրք-հանրագիտարանը նոյեմբերի 3-ին հանձնվեց ընթերցողի դատին: Գրքի շնորհանդեսին «Տավուշ հայրենակցական միություն» ՀԿ-ի նախագահ Դերենիկ Դումանյանը ներկաներին վստահեցրեց, որ գիրքը միանշանակ մնայուն արժեք է լինելու ապագա սերնդի համար: Յուրաքանչյուր քաղաքացի պետք է իր արմատների տեղն իմանա: Լավրենտի Միրզոյանը կարեւոր գործ է կատարում վավերագրելով, փաստագրելով եղածը»,-«Արմենպրես»-ի փոխանցմամբ` ասաց նա:

Տավուշի թեմի առաջնորդ Բագրատ Սրբազանը, շնորհավորելով Լավրենտի Միզոյանին հերթական զավակի լույս ծննդյան առթիվ, նշեց, որ Հայաստանը հրաշալի վայր է, բայց Տավուշը բացառիկ է: «Այս գրքով հեղինակը տարածել է Տավուշի ամբողջ համն ու հոտը»,-ասաց նա:

Հայաստանի սահմանամերձ մարզի մտավոր ներուժի մասին գիրք գրելու՝ Լավրենտի Միրզոյանի մտահղացումը պատահական չէր: Նախկին Շամշադինի շրջանի գիտության նվիրյալների թիվն անցնում է մի քանի հարյուրը, որոնց մասին հեղինակն անդրադարձել էր դեռևս տարիներ առաջ՝ «Տավուշ» վերնագրով հաստափոր ժողովածուի մեջ: 

Գիրքը նվիրված է Տավուշի մարզի «Իջևան», «Դիլիջան», «Տավուշ» և «Նոյեմբերյան» տարածաշրջանների մտավորականներին՝ գրողներին, դերասաններին, նկարիչներին, ճարտարապետներին, քանդակագործներին, լրագրողներին, բանասացներին, հրատարակիչներին, քաղաքագետ֊ հասարակագետներին, ճարտասաններին, ժողովրդական վարպետներին, կրթամարզական գործիչներին՝ նրանց, ովքեր ճանաչելի են դարձրել ու դարձնում են Հայաստանի հյուսիս-արևելյան չնաշխարհիկ բնօրրանները։ Գիրքը հնարավորություն կընձեռի ավելի խորը ծանոթանալու Տավուշի հոգեւոր գանձերին՝ պատմամ շակութային հուշարձաններին, մշակույթին։ Գրական-մարզամշակութային եզակի այս հանրագիտարանը հասցեագրված է ընթերցող լայն շրջանակներին։