Մշակույթի նախարարությունը Գյումրիում երկու միջազգային փառատոն կանցկացնի

Զբոսաշրջային առումով Երեւանը պետք է բեռնաթափել: Այդ սկզբունքից ելնելով՝ ՀՀ մշակույթի նախարարությունը նախատեսում է 2017 թվականին միջազգային երկու փառատոն անցկացնել Գյումրիում: «Արմենպրես»-ի հաղորդմամբ, այս մասին հոկտեմբերի 27-ին BPA (Business Partners of Armenia) ընկերության  «Welcome To Armenia 2016» հայաստանյան տուրիզմի հա մաժողովին ասաց ՀՀ մշակույթի նախարար Արմեն Ամիրյանը:

Նրա խոսքով` Գյումրիում նախանշված է խմբերգային երաժշտության եւ դուդուկի միջազգային փառատոններ անցկացնել:

Հայաստանում տուրիզմի զարգացմանն ուղղված հաջորդ քայլը նախարարը տեսավ պատմամշակութային հուշարձանների ոլորտում: «Հայաստանի պատմամշակութային հուշարձանները կվերանորոգվեն իրենց ենթակառուցվածքներով հանդերձ: Նախատեսում ենք տարեկան 3-4 հուշարձան վերանորոգել»,- ասաց նա:

Ամիրյանը փաստեց, որ նախատեսվում է Հայաստանի պատմամշակութային հուշարձանների մասին պատմող գիրք-ալբոմ ստեղծել: «Այնտեղ ներառված կլինեն գեղեցիկ լուսանկարներ, որոնք կլինեն ե՛ւ տպագիր, ե՛ւ էլեկտրոնային տեսքով: Մենք նախատեսում ենք այնտեղ ներառել նաեւ պատմամշակութային հուշարձանների մասին պատմող հետաքրքիր լեգենդներ, որոնք կգրավեն զբոսաշրջիկներին»,-հավելեց նախարարը՝ նշելով, որ մշակույթի նախարարությունը պատրաստ է լսել եւ քննարկել մշակութային զբոսաշրջությանը վերաբերող ցանկացած առաջարկ: