ABBA-ի անդամները վերամիավորվելու են հանուն նոր նախագծի. Associated Press

 Հանրաճանաչ ABBA շվեդական փոփ-խմբի մասնակիցները հոկտեմբերի 26-ին հայտարարել են հաջորդ տարի վերամիավորվելու մասին՝ նոր թվային նախագիծ իրականացնելու նպատակով: Այդ մասին, ինչպես տեղեկացնում Է «Արմենպրես»-ը, հայտնել Է Associated Press գործակալությունը:

Ագնետա Ֆելտսկոգը, Բյոռն Ուլվեուսը, Բեննի Անդերսոնը եւ Աննի-Ֆրիդ Լինգստադը տեղեկացրել են, որ իրենց համատեղ աշխատանքի նպատակը դառնալու Է շոու-բիզնեսի բնագավառում ինքնատիպ նախագծի իրականացումը, որը «նոր սերնդի երկրպագուներին թույլ կտա ABBA խումբը տեսնել, լսել եւ զգալ այնպիսին, ինչպիսին նրանք երբեք այն չեն պատկերացրել»: Երաժիշտները ոչ մի մանրամասնություն չեն ներկայացրել: 

Այս տարվա հունիսին ABBA-ի չորս մասնակիցները միասին Ստոկհոլմի «Բյոռնս» ակումբում իրենց երգերը կատարել են  համատեղ ստեղծագործական գործունեության 50-ամյակի պատվին կազմակերպված երեկույթում:

Շվեդական ABBA քառյակը՝ առավել մեծ ժողովրդականություն վայելող կոլեկտիվներից մեկը երաժշտության պատմության մեջ, ստեղծվել Է 1972 թվականին: Իր գոյության տասը տարվա ընթացքում քառյակը թողարկել Է ութ ալբոմ, իսկ նրա երգերի բազմաթիվ ժողովածուներ թողարկվում են մինչեւ օրս:

Ամեն տարի իրենց գնորդներին են գտնում խմբի մինչեւ 3 մլն սկավառակներ: Mamma Mia! («Մամա միա») մյուզիքլը, որի հիմքում ընկած են ABBA-ի երգերը, արդեն շուրջ 60 մլն մարդ Է դիտել աշխարհի հարյուրավոր թատրոններում, հաղորդել Է ՏԱՍՍ-ը: