Կալեում փախստականների ճամբարում բախում է տեղի ունեցել ոստիկանների եւ միգրանտների միջեւ

Ֆրանսիական Կալեում փախստականների ճամբարում, որը ստացել է «ջունգլի» անունը, բախում է տեղի ունեցել ոստիկանների եւ միգրանտների միջեւ, հաղորդում է BBC-ն։

Ֆրանսիայի Պա դե Կալե դեպարտամենտում փախստականների ճամբարի քանդումը կսկսվի հոկտեմբերի 24-ին։

Միջադեպը տեղի է ունեցել շաբաթ երեկոյան, երբ միգրանտների 50 հոգանոց խումբը քարեր է նետել ոստիկանների ուղղությամբ։ Իրավիճակը կարգավորելու համար իրավապահները ստիպված են եղել ծխանռնակներ եւ մահակներ կիրառել։

Auberge des migrants կամավորական շարժման ներկայացուցիչները եւ մի շարք բարեգործական կազմակերպություններ կարծում են, որ մոտ 2 հազար միգրանտներ կարող են հրաժարավել լքել ճամբարը, քանի որ նախկինի պես մտադիր են հասնել Մեծ Բրիտանիա։ Հեռուստաալիքը նշում է, որ իշխանությունները հույս ունեն, որ ճամբարը քանդելիս ստիպված չեն լինի ուժ կիրառել։

Ֆրանսիայի իշխանությունները մոտ 10 հազար թռուցիկ կբաժանեն, որպեսզի միգրանտներին տեղեկացնեն այն վայրերի մասին, որտեղից ավտոբուսները կվերցնեն նրանց։ Կիրակի օրվանից միգրանտներին կսկսեն տեղափոխել երկրի տարբեր հատվածներ, որտեղ նրանց հնարավորություն կտրվի փախստականի կարգավիճակ ստանալու դիմումներ ներկայացնել։

Ներկայումս առնվազն 9 հազար ապօրինի ներգաղթյալ է ապրում Ֆրանիական Կալեում, որտեղ սկսվում է Եվրոթունելը։ Նրանք ցանկացած միջոցի դիմում են, որպեսզի հայտնվեն Մեծ Բրիտանիայում։ Փախստականների մեծ մասը Ֆրանսիա է եկել Էրիթրեայից, Սուդանից եւ Սոմալիից, ինչպես նաեւ Սիրիայից եւ Աֆղանստանից։